අහුවෙන්න එපා ෆේස්බුක් එකෙන් අමුතු ආගම් ප්‍රචාරයේ! ඔබටත් මේ පණිවිඩය ආවද?

විවිධ නිකායන් වල ප්‍රචාරනයන්ට අහු වෙන්න එපා! ඔයාත් අනිවාර්යෙන් මේක දැකලා තියෙනවා

කරුණා කරලා මේක කියවන්න. විහිලුවක් නෙවෙයි. ඔබ යම්කිසි අරගලයක සිටිනවා දෙවියන්වහන්සේ දැක තිබෙනවා. දෙවියන්වහන්සේ කියනවා දැන් හැමදෙයක්ම ඉවරයි කියලා. උන්වහන්සේගේ ආශිර්වාදය ඔබගේ ගමනට ලබා දෙනවා. ඔබ දෙවියන්වහන්සේව විශ්වාස කරනවා නම් මේ මැසේජ් එක යවන්න. කරුණාකරලා මේක නොසලකා හරින්න එපා. ඔබ පරික්ෂාවට ලක් වී ඉවරයි. අද රාත්‍රියේදී දෙවියෝ ඔබේ කැමැත්තවල් දෙකක් ඉටු කරයි. ඔබ දෙවියන්ව විශ්වාස කරනවා නම් හැමදෙයක්ම අත ඇරලා අමතක කරලා දාන්න. හෙට ඔබගේ ජීවිතයේ හොඳම දවස වේවි. මේක කියවලා විනාඩි විස්සක් ඇතුලත මේක ඔබේ කරුණාවන්ත යාලුවෝ තිස් දෙනෙකුට යවන්න.”

ඉහත දක්වා ඇත්තේ මේ දිනවල ෆේස්බුක් මගින් සීඝ්‍රයෙන් හුවමාරු වන පණිවිඩයකි.

ඉන් පැවසෙනුයේ ‘දිව්‍යමය වරප්‍රසාදයක්’ පිළිබඳවය ඒ වරප්‍රසාදය හිමිකර ගැනීමට ඔබ විසින් කළ යුත්තේ  ඒ පණිවිඩය තවත් 30 දෙනෙකු අතරේ පතුරුවාලීම පමණි. ඒ සඳහා ඔබ හට දී ඇති කාලය විනාඩි විස්සකි. අන්තර් ජාලයේ හිඳින්නෙකුට මෙය ‘කජු කන්නාක්’ වැනි පහසු කටයුත්කත් බව අමුතුවෙන් කිව යුතු නැත අනුරාධපුර නාග විහාරයේ බවුන් වඩන භික්ෂුවක් පිළිබඳව සඳහන් කරමින් අරඹන ලද මෙවන් ලිපියක් ද ඔබ අතට පත්වී තිබෙන්නට පුළුවන. ‘මුචලින්ද නාග රාජයාගේ පුත්‍ර රත්නය’ වශයෙන් හඳුනාගත් නාගයෙකු පිළිබඳ හාස්‍යජනක පුවතක් සහිත එම ලිපියෙන් පැවසී තිබුණේ එය ලැබී දින 10 තුළ එහි පිටපත් දහදෙනෙකු වෙත යොමු කරන ලෙසය. එසේ කිරීමෙන් ‘මහත් ධන සම්පත්, යස ඉසුරු’ හිමිවන බවටත් එය නොතකා හැරීමෙන් ‘මහත්විපත්’ සිදුවන බවටත් එහි සඳහන්ව තිබේ. ඒ කිසිදු මූලාශ්‍රයකට ගොනු කොට ගත නොහැකි ‘ව්‍යාජ සාක්ෂි’ කිහිපයක්ද ඉදිරිපත් සමගිනි.

මෙවැනි ලිපි දුටු විට ඔබද බුදු දහම පිලිබඳ ඇති පහදීම නිසා ඒවා ප්‍රචාරණයට උදව් කලද එයින් සිදු වන්නේ ව්‍යාජ මත සමාජ ගත වීම නිසා නිර්මල බුදු දහමේ විනශයක් බව අප තේරුම් ගත යුතුය. එක අතකින් රක් මුලධර්ම වාදයක් ප්‍රචාරණය කරන ගමන්ම මෙවන් වැරදි මත බුදු දහම පිලිබඳ ප්‍රචාරණය තුලින් නිර්මල බුදු දහම පිලිබඳ ඇති පැහැදීම විනාශ කිරීමේ අරමුණෙන් එකම කණ්ඩායමක් විසින් මෙම ක්‍රියාවන් සිදු කරනවා විය හැක.

දැන් අපි යළි මෙම  ෆේස්බුක් පණිවිඩය කෙරෙහි විමසීමක් කරමු.

එහි මෙසේ සඳහන් වේ.

“කරුණාකරලා මේක කියවන්න. විහිලුවක් නෙවෙයි. ඔබ යම්කිසි අරගලයක සිටිනවා දෙවියන්වහන්සේ දැක තිබෙනවා. දෙවියන්වහන්සේ කියනවා දැන් හැමදෙයක්ම ඉවරයි කියලා. උන්වහන්සේගේ ආශිර්වාදය ඔබගේ ගමනට ලබා දෙනවා.”මෙහිදී මෙය අප වෙත එවන්නේ කවුද? දෙවියන් වහන්සේ අප වෙත බැල්ම හෙලා හිඳින බව; ආශිර්වාද කරන බව; මේ එවන පුද්ගලයා දැන ගත්තේ කෙ‍සේද?  ආදී ගැටළු විචාරාත්මක මනැසක් ඇති ඕනෑම කෙනෙකුගේ සිතට නැගෙනු නියතය.

එමෙන්ම ඔබ යම් කිසි අරගලයක සිටිනවා දෙවියන් වහන්සේ දැක තිබෙනවා යන්න එය කියවන ඕනෑම කෙනෙකුට ඕනෑම අයුරකින් ගලපාගත හැකි සටකපට ප්‍රකාශයකි. ඒ මදිවාට සෑම ජීවිතයකම, සෑම මොහොතක් ගාණේම පැන නගින විවිධාකාරයේ ගැටළු අර්බුද තිබේ. පුදුමයක් වනුයේ එවැනි ගැටළු අර්බුද නැති අයෙකු සිටිය හොත් පමණි.

 

ඒ මදිවාට  අපෙන් කිසිදු අයදුමකින් හෝ අවසරයකින් තොරවම උන්වහන්සේ අපට ආශිර්වාද කිරීමට ද පැමිණ තිබේ. ඒත් ඒ කුමන පදනමක් යටතේ දැයි අපට සිතා ගත නොහැක. ඊ ළඟට මෙම ලිපියේ සඳහන් මෙම සාටෝපකාරී වදන විමසා බලමු.

“ඔබ පරික්ෂාවට ලක් වී ඉවරයි. අද රාත්‍රියේදී දෙවියෝ ඔබේ කැමැත්තවල් දෙකක් ඉටු කරයි.”

මෙයද අතිශය වංචනික සටකපට ප්‍රකාශයකි. මොවුන් මේ ලිපියෙන් සඳහන් කරන කැමැත්තවල් දෙක කුමක්ද?  ඒ පිළිබඳ කිසිවක් මෙහි සඳහන්ව නැත.

“අද රෑ කෑමට බැදුමක් තිබුණොත් හොඳයි යනුවෙන් සිතා කෑම මේසයට වාඩි වන ඔබට එහි කරවල බැදුමක් තිබෙනු දුටුවහොත් එය දෙවියන් වහන්සේ ඔබට දුන් තෑග්ගක් ලෙස හැඟීයනු ඇත.  එය දෙවියන් ඉටු කර දෙන කැමැත්තවල් දෙකෙන් එකක් ලෙසට එය ගණන් හදාගැනීමට ද ඔබට පුළුවන. ඊළඟට  නිදන ඇඳට අලුත් ඇතිරිල්ලක් තිබුණහොත් හොඳ යැයි ඔබ සිතා සිටින විටෙක කවුරුන් හෝ එම කටයුත්ත සපුරා ලූ පසු එයද දෙවියන්ගේ ක්‍රියාවකැයි ඔබට සිතෙනු නියතය.

ඒ අනුව මෙම ලිපියෙන් සිදු කොට ඇත්තේ කාටත් වැටහෙන ලෙස කිවහොත් ‘කනාපල්ලන් ගැසීමකි.’

ඊ ළඟට එහි මෙසේද සඳහන් වෙයි. “ඔබ දෙවියන්ව විශ්වාස කරනවා නම් හැම දෙයක්ම අතහැරලා දාන්න.’ මෙහි හැම දෙයක්ම යන්නෙන් දෙවියන් වහන්සේද ඇතුලත් වී ඇතැයි සිතීමට නොපුළුවන. ඊළඟට එහි ඇත්තේ ‍ “හෙට ඔබගේ ජීවිතයේ හොඳම දවස වේවි.” යනුවෙනි.

මෙය ඉතා සරළ මනෝවිද්‍යාත්මක කරුණක් කනපිට ගසා දැක්වීමකි. අපට හැම දෙයක්ම අත හැරීමට, අමතක කිරීමට හැකි නම් ඒ ඔස්සේ අපට සහනයක් ලබා දීමට අමුතුවෙන් ‘දෙවියෙකු, බ්‍රග්මයකු හෝ යකෙකු’ උවමනා නැත. මක් නිසාද අතහැරීම සහනයට මුලක් බව ප්‍රායෝගික සත්‍යයක් බැවිනි. මෙම  ලිපියෙහි අවසානයෙහි ඇත්තේ “මේක කියවලා විනාඩි විස්සක් ඇතුලත මේක ඔබේ කරුණාවන්ත යාලුවෝ තිස් දෙනෙකුට යවන්න.” යනුවෙනි.

ඉන් පළමු වැන්න මෙම ලිපි කිසියම් සඛ්‍යාවක් යැවීමෙන් මහත් වූ වරප්‍රසාද අත්වන බව පැවසීමය. දෙවැන්න එසේ නොකිරීමෙන් බිහිසුණු විපත් අත්වන බව පැවසීමය. කෙසේ හෝ අතීතයේ දින 10 ක් තුළ ලිපි 10 ක්  වශයෙන් මන්දගාමී ලෙස සමාජ ගත කළ යුතු යැයි ‘දෙවියන් කී’ මෙම පණිවිඩය නූතන විද්‍යුත් තාක්ෂණය සහ තොරතුරු සන්නිවේදන ජාල ඔස්සේ විනාඩි 20 ක් තුළ 30 ක් යවන තරමට වේගවත් වී ඇත්තේ එය ද ‘දේව නියමයක්’ නිසා දැයි අපි නොදනිමු.

කෙසේ හෝ විචාර බුද්ධියෙන් තොර පුද්ගලයන් අනවශ්‍ය මානසික කුළුගැන්වීම් වලට  සහ කැළඹීම් වලට ලක් කරවන මෙවැනි භාවාතිශය කරුණු අන්තර් ජාලයෙන් ප්‍රචලිත කිරීම දේවත්වයේ නාමයෙන් මනුෂ්‍යත්ව කෙලෙසා ගැනීමක් බව නොකියාම බැරිය.

වාර්තා වී ඇති දිගම දන්වැල් ලිපිය. (ක්‍රිස්තියානි නිකායක් ප්‍රචාරණය සඳහා යොදා ගෙන ඇත )

 

 

 

 

 

 

 

 

 

උපුටා ගැනීම ලක්බිම වෙතිනි.

Comments

අදහස් ලියන්න

Leave a Reply

Your email address will not be published. Required fields are marked *